बेंगळुरू : बेंगळुरूमधील एचएएल परिसरात कॅपजेमिनी कंपनीच्या कॅम्पसमध्ये कार्यरत असलेल्या एका डे-केअर सेंटरमध्ये लहान मुलांवर कथितपणे अमानुष वागणूक दिल्याचा अत्यंत धक्कादायक प्रकार समोर आला आहे. सोशल मीडियावर व्हायरल झालेल्या काही व्हिडिओंमुळे या घटनेचा पर्दाफाश झाला असून, देशभरात संतापाची लाट उसळली आहे. या प्रकरणी पोलिसांनी डे-केअर सेंटरमधील पाच महिला केअरगिव्हर्सविरुद्ध गुन्हा दाखल केला असून, बालहक्क संरक्षण यंत्रणांनीही स्वतंत्र चौकशी सुरू केली आहे.
तक्रारीनुसार, डे-केअर सेंटरमध्ये दोन ते तीन वर्षे वयोगटातील चिमुकल्या मुलांना रडल्यास किंवा हट्ट केल्यास अत्यंत अमानुष पद्धतीने शिक्षा दिली जात होती. मुलांना फ्रंट-लोडिंग वॉशिंग मशीनच्या ड्रममध्ये बसवून ठेवणे, बाथरूममध्ये कोंडून ठेवणे तसेच टॉयलेट जेटमधून पाण्याचा जोरदार फवारा मारून त्यांना घाबरविणे अशा प्रकारच्या वागणुकीचे आरोप करण्यात आले आहेत. या प्रकारामुळे पालकांमध्ये भीती आणि संतापाचे वातावरण निर्माण झाले आहे.
सोशल मीडियावर समोर आलेल्या व्हिडिओंमध्ये काही लहान मुले घाबरलेली आणि रडताना दिसत असल्याचा दावा करण्यात येत आहे. हे व्हिडिओ समोर आल्यानंतर अनेक पालकांनी तातडीने पोलिसांकडे धाव घेतली. त्याचबरोबर कर्नाटक राज्य बालहक्क संरक्षण आयोगाकडेही या घटनेची अधिकृत तक्रार करण्यात आली. प्राथमिक चौकशीनंतर पोलिसांनी संबंधित डे-केअर सेंटरमधील पाच महिला कर्मचाऱ्यांविरुद्ध गुन्हा दाखल करून तपास सुरू केला आहे.
पोलिसांनी सांगितले की, व्हिडिओंची सत्यता पडताळून पाहण्यासाठी तांत्रिक तपास सुरू असून, संबंधित कर्मचाऱ्यांची चौकशी केली जात आहे. डे-केअर सेंटरमधील सीसीटीव्ही फुटेज, कर्मचाऱ्यांची उपस्थिती नोंद, तसेच पालक आणि इतर साक्षीदारांचे जबाब नोंदवले जात आहेत. चौकशीत दोषी आढळणाऱ्यांविरुद्ध कठोर कायदेशीर कारवाई करण्यात येणार असल्याचे अधिकाऱ्यांनी स्पष्ट केले आहे.
दरम्यान, या घटनेने कामकाजी पालकांमध्ये मोठी चिंता निर्माण केली आहे. अनेक पालक आपल्या मुलांच्या सुरक्षिततेसाठी डे-केअर सेंटरवर विश्वास ठेवतात. मात्र अशा प्रकारच्या घटना समोर आल्याने मुलांच्या सुरक्षेच्या उपाययोजनांवर प्रश्नचिन्ह निर्माण झाले आहे. अनेक पालकांनी डे-केअर सेंटरमधील देखरेख, कर्मचाऱ्यांचे प्रशिक्षण आणि नियमित तपासणी अधिक कठोर करण्याची मागणी केली आहे.
बालहक्क कार्यकर्त्यांनीही या घटनेचा तीव्र निषेध करत, लहान मुलांवरील कोणत्याही प्रकारच्या शारीरिक किंवा मानसिक अत्याचाराला अजिबात सहन केले जाणार नसल्याचे म्हटले आहे. अशा संस्थांमध्ये नियुक्त होणाऱ्या कर्मचाऱ्यांची पार्श्वभूमी तपासणे, त्यांना बालसंगोपनाचे विशेष प्रशिक्षण देणे आणि नियमित निरीक्षण करणे आवश्यक असल्याचे तज्ज्ञांचे मत आहे.
कर्नाटक राज्य बालहक्क संरक्षण आयोगाने या प्रकरणाची गंभीर दखल घेतली असून, संबंधित डे-केअर सेंटरकडून सविस्तर अहवाल मागविण्यात आला आहे. मुलांच्या सुरक्षिततेशी कोणतीही तडजोड सहन केली जाणार नाही, असे आयोगाने स्पष्ट केले आहे. चौकशीनंतर आवश्यक असल्यास संबंधित संस्थेचा परवाना रद्द करण्यासह इतर कठोर उपाययोजनाही केल्या जाऊ शकतात, अशी माहिती सूत्रांनी दिली.
या प्रकरणामुळे कंपन्यांच्या कॅम्पसमध्ये चालवल्या जाणाऱ्या डे-केअर केंद्रांच्या कामकाजावरही चर्चा सुरू झाली आहे. कर्मचारी आणि त्यांच्या मुलांच्या सुरक्षेसाठी अशा केंद्रांमध्ये नियमित लेखापरीक्षण, सीसीटीव्ही देखरेख, तक्रार निवारण यंत्रणा आणि पालकांसाठी पारदर्शक व्यवस्था असणे आवश्यक असल्याची मागणी जोर धरत आहे.
सध्या पोलिसांचा तपास सुरू असून, व्हायरल व्हिडिओतील प्रत्येक घटनेची पडताळणी केली जात आहे. चौकशी अहवाल आल्यानंतर पुढील कायदेशीर कारवाई करण्यात येणार आहे. या धक्कादायक घटनेमुळे बालसंगोपन केंद्रांमधील सुरक्षेचा मुद्दा पुन्हा एकदा ऐरणीवर आला असून, दोषींवर कठोर कारवाईची मागणी सर्व स्तरांतून होत आहे.
About the Author
