आषाढी वारी 2025 च्या पार्श्वभूमीवर प्रशासनाने तयारीला वेग दिला असून वारकरी भाविकांना सर्व मूलभूत सुविधा उपलब्ध करून देण्यासाठी विविध विभागांना आवश्यक सूचना देण्यात आल्या आहेत. आषाढी शुद्ध एकादशीचा सोहळा साजरा होणार असून, या निमित्ताने श्री ज्ञानेश्वर महाराज, संत तुकाराम महाराज तसेच इतर संतांच्या पालखी सोहळ्यांसोबत लाखो वारकरी पंढरपूरकडे प्रस्थान करणार आहेत.
या पार्श्वभूमीवर आयोजित आढावा बैठकीत विभागीय आयुक्त शितल तेली-उगले यांनी पालखी मार्ग, पालखी तळ, विसावा स्थळे आणि रिंगण सोहळ्यांच्या ठिकाणी स्वच्छता, पिण्याचे पाणी, आरोग्य सेवा, सुरक्षा आणि वीजपुरवठा यांसारख्या सुविधांना सर्वोच्च प्राधान्य देण्याच्या सूचना दिल्या.
बैठकीस जिल्हाधिकारी कार्तिकेयन एस., मुख्य कार्यकारी अधिकारी कुशल जैन, अप्पर आयुक्त तुषार ठोंबरे, सहाय्यक पोलीस अधीक्षक प्रशांत डगळे, प्रांताधिकारी सचिन इथापे, विजया पांगारकर, मंदिर समितीचे कार्यकारी अधिकारी राजेंद्र शेळके यांच्यासह विविध विभागांचे वरिष्ठ अधिकारी उपस्थित होते.
विभागीय आयुक्तांनी पालखी मार्गावरील रस्त्यांची वारीपूर्वी दुरुस्ती करण्याचे निर्देश दिले. पालखी तळांवर आवश्यक त्या ठिकाणी मुरमीकरण, स्वच्छता, मुबलक पाणीपुरवठा, वीज आणि आरोग्य सुविधा उपलब्ध करून देण्यावर त्यांनी भर दिला. नातेपुते येथील संत ज्ञानेश्वर महाराज पालखी तळाच्या वाढीव जागेबाबत तातडीने कार्यवाही करण्याचेही निर्देश देण्यात आले.
पालखी तळांवरील अतिक्रमणे हटवून परिसर स्वच्छ आणि प्रशस्त ठेवण्याचे आदेश देण्यात आले आहेत. तसेच भाविकांच्या सुरक्षिततेसाठी हायमास्ट दिव्यांची संख्या वाढविण्यात येणार आहे. श्री संत सोपानकाका पालखी सोहळ्यासाठी भंडीशेगाव येथे नव्याने उपलब्ध झालेल्या पालखी तळावरील जलसंपदा विभागाच्या जुन्या इमारती 30 जूनपूर्वी पाडून त्या जागेचे सपाटीकरण आणि मुरमीकरण करण्याचे निर्देशही देण्यात आले.
वारकऱ्यांच्या सोयीसाठी सर्व पालखी तळांवर पुरेशा प्रमाणात शौचालयांची व्यवस्था उभारण्यात येणार असून, स्वच्छता मोहिमेवर विशेष भर दिला जाणार आहे. याशिवाय कायमस्वरूपी सुविधा निर्माण करण्याबाबत पालखी सोहळा प्रमुखांशी चर्चा करून दीर्घकालीन नियोजन करण्याच्या सूचनाही देण्यात आल्या.
वारी काळात आरोग्य सेवेचे महत्त्व लक्षात घेऊन वैद्यकीय पथके, रुग्णवाहिका तसेच तज्ज्ञ डॉक्टरांची नेमणूक करण्याचे निर्देश प्रशासनाला देण्यात आले आहेत. लाखो भाविकांच्या गर्दीत कोणतीही आरोग्यविषयक अडचण निर्माण होऊ नये यासाठी विशेष उपाययोजना राबविण्यात येणार आहेत.
प्रशासनाकडून 65 एकर परिसरात विविध दिंड्यांना जागा उपलब्ध करून दिली जाते. मात्र, दरवर्षी वाढणाऱ्या दिंड्यांच्या संख्येमुळे जागेची कमतरता भासल्यास पर्यायी जागा उपलब्ध करून देण्याचे निर्देशही विभागीय आयुक्तांनी दिले. यामुळे वारकऱ्यांची गैरसोय टाळण्यास मदत होणार आहे.
आषाढी वारी हा महाराष्ट्राच्या सांस्कृतिक आणि आध्यात्मिक परंपरेचा महत्त्वाचा सोहळा मानला जातो. लाखो वारकरी पायी चालत विठुरायाच्या दर्शनासाठी पंढरपूर गाठतात. त्यामुळे या सोहळ्याचे सुयोग्य नियोजन करण्यासाठी प्रशासन सज्ज झाले असून, भाविकांना सुरक्षित, स्वच्छ आणि सुविधायुक्त वारी अनुभव मिळावा यासाठी सर्व विभाग समन्वयाने काम करत आहेत.
About the Author
