सांगोला प्रतिनिधी : पर्यावरण संवर्धन, हरित क्षेत्रात वाढ, जैवविविधतेचे संरक्षण आणि शहराचा पर्यावरणीय समतोल राखण्याच्या उद्देशाने ‘माझी वसुंधरा अभियान ७.०’ अंतर्गत सांगोला नगरपरिषदेच्या वतीने जुना पारे रोड परिसरात वृक्षारोपणाचा उपक्रम राबविण्यात आला. नगरपरिषदेचे मुख्याधिकारी डॉ. सुधीर गवळी व उपनगराध्यक्ष मा. नितीन इंगोले यांच्या हस्ते या उपक्रमाचा शुभारंभ करण्यात आला.
वाढते शहरीकरण, बदलते तापमान आणि हवामानातील बदल यामुळे पर्यावरण संरक्षणाची गरज दिवसेंदिवस अधिक तीव्र होत आहे. शहरातील हरित क्षेत्र वाढविण्यासोबतच नागरिकांना स्वच्छ आणि निरोगी वातावरण उपलब्ध करून देणे, हा या उपक्रमामागील प्रमुख उद्देश आहे. शहराच्या विविध भागांत मोठ्या प्रमाणावर वृक्षारोपण करून त्यांचे संगोपन करण्यावर नगरपरिषदेने भर दिला आहे.
सांगोला शहरातील सार्वजनिक ठिकाणे, उपलब्ध मोकळ्या जागा, रस्त्यांच्या कडेला तसेच आवश्यक ठिकाणी वृक्षारोपण करण्याचे नियोजन करण्यात आले आहे. ‘एक झाड लावलेले नको, तर प्रत्येक लावलेले झाड जगवायचे’ या संकल्पनेवर नगरपरिषदेकडून विशेष भर देण्यात येत आहे. केवळ वृक्षारोपण करून थांबण्याऐवजी लावलेल्या रोपांची नियमित देखभाल, पाणीपुरवठा आणि संरक्षण करण्याची जबाबदारीही निश्चित करण्यात आली आहे.
वृक्षारोपणामुळे शहरातील प्रदूषण कमी होण्यास, तापमान नियंत्रित राहण्यास आणि हवेची गुणवत्ता सुधारण्यास मदत होते. त्याचबरोबर जैवविविधतेचे संवर्धन होऊन शहर अधिक हिरवेगार आणि पर्यावरणपूरक होण्यास हातभार लागतो. त्यामुळे नागरिकांनी पर्यावरण संवर्धनाला सामाजिक जबाबदारी मानून वृक्षारोपण व वृक्षसंवर्धनाच्या उपक्रमात सक्रिय सहभाग घ्यावा, असे आवाहन करण्यात आले.
या उपक्रमास नगरपरिषदेचे मुख्याधिकारी डॉ. सुधीर गवळी , कर्मचारी तसेच नगरपरिषद प्रशासनातील अधिकारी उपस्थित होते. लोकनियुक्त नगराध्यक्ष मा. आनंद माने यांच्या नेतृत्वाखाली शहराच्या सर्वांगीण विकासासोबत पर्यावरणपूरक विकासालाही प्राधान्य देण्यात येत आहे. शहर स्वच्छ, सुंदर, हिरवेगार आणि पर्यावरणपूरक करण्याचा नगरपरिषदेचा संकल्प असल्याचे यावेळी सांगण्यात आले.
‘स्वच्छ सांगोला – सुंदर सांगोला – हरित सांगोला’ या संकल्पनेला चालना देण्यासाठी ‘माझी वसुंधरा अभियान ७.०’ अंतर्गत पर्यावरण संवर्धनासाठी सांगोला नगरपरिषद कटिबद्ध आहे. शहरात लावण्यात येणाऱ्या प्रत्येक रोपाची योग्य पद्धतीने देखभाल व्हावी, यासाठी आवश्यक नियोजन करण्यात येत आहे.
पर्यावरण संवर्धन ही केवळ प्रशासनाची जबाबदारी नसून प्रत्येक नागरिकाचीही सामाजिक जबाबदारी आहे. शहरातील नागरिकांनी आपल्या परिसरात वृक्षारोपण करणे, लावलेल्या झाडांची नियमित काळजी घेणे, पाणी देणे आणि झाडांचे संरक्षण करणे आवश्यक आहे. सामूहिक सहभागातूनच सांगोला शहर अधिक हिरवेगार आणि पर्यावरणपूरक बनू शकते.
सांगोला नगरपरिषदेच्या या उपक्रमामुळे पर्यावरण संवर्धनासोबतच शहराच्या सौंदर्यातही भर पडणार आहे. आगामी काळात अशा प्रकारचे आणखी उपक्रम राबवून नागरिकांचा सहभाग वाढविण्याचा प्रयत्न केला जाणार आहे. पर्यावरण रक्षणाचा संदेश समाजातील प्रत्येक घटकापर्यंत पोहोचवून हरित आणि सुंदर सांगोला घडविण्याचा निर्धार या उपक्रमातून व्यक्त झाला आहे.
About the Author
