सांगोला प्रतिनिधी: तालुक्यातील एकतपूर येथे जुन्या भांडणाचा वाद मिटवण्यासाठी गेलेल्या व्यक्तींवरच हल्ला केल्याची घटना नोंद पोलिसांत करण्यात आली आहे. या प्रकरणात तलवारसदृश चमकणाऱ्या वस्तूने तसेच कुऱ्हाडीच्या लोखंडी दांड्याने मारहाण करून अनेकांना जखमी केल्याचा आरोप करण्यात आला आहे. याशिवाय काळ्या रंगाच्या क्रेटा वाहनाची तोडफोड करून नुकसान केल्याचीही तक्रार दाखल करण्यात आली आहे.
पोलिसांत दाखल करण्यात आलेल्या फिर्यादीनुसार, काही जण एकतपूर येथील सुनिता पाटील यांच्या घरी झालेला वाद मिटवण्यासाठी गेले होते. यावेळी तेथे सुरज पाटील, उदय पाटील, प्रताप पाटील, विजय बबन पाटील, शोभा पाटील, पुणम पाटील, चित्रा पाटील आणि काजल पाटील, सर्व उपस्थित होते.
वाद मिटवण्यासाठी गेलेल्या व्यक्तींना उद्देशून ‘तुम्ही आमचे भांडण मिटवणारे कोण?’ असे म्हणत वाद घालण्यात आल्याचा आरोप आहे. त्यानंतर उदय पाटील याने स्टीलसारखे चमकणारे, तलवारीसदृश काहीतरी हत्यार हातात घेऊन फिर्यादीच्या डाव्या हाताच्या मनगटाजवळील भागावर मारून जखमी केले.
पुन्हा हल्ला करण्याचा प्रयत्न होत असताना दत्ता पाटील हा मध्ये आला. त्यावेळी त्याच्या उजव्या हाताला दुखापत झाली याच दरम्यान सुरज पाटील याने त्याच प्रकारच्या हत्याराने अशोक पाटील यांच्या डोक्यात आणि पाठीवर मारून त्यांना जखमी करणात आले
तसेच विजय विठ्ठल पाटील यांच्या मानेवरही सुरज पाटील याने त्या साधनाने मारहाण करून जखम केली. या घटनेमुळे परिसरात काही काळ तणावाचे वातावरण निर्माण झाले.
दरम्यान, प्रताप पाटील याने विजय बबन पाटील यांच्या हातातील कुऱ्हाडीच्या लोखंडी दांड्याने फिर्यादीच्या पायावर तसेच पाठीवर मारहाण केल्याचा आरोप आहे. एवढेच नव्हे तर चुलते अशोक पाटील यांच्या डोक्यातही कुऱ्हाडीच्या दांड्याने मारहाण करण्यात आली
या मारहाणीत पुणम पाटील, चित्रा पाटील आणि काजल पाटील यांनीही फिर्यादीला लाथाबुक्क्यांनी मारहाण करून शिवीगाळ केल्याचा आरोप करण्यात आला आहे. तसेच फिर्यादीचे चुलत भाऊ भागवत मनोहर पाटील यांना शोभा बबन पाटील यांनी गुडघ्यावर काठीने मारहाण केल्याचेही पोलिसांत नमूद करण्यात आले आहे.
मारहाणीपुरतेच हे प्रकरण थांबले नसून, या घटनेदरम्यान क्रेटा वाहनाचीही तोडफोड करण्यात आल्याचा आरोप आहे. त्यामुळे या प्रकरणात मारहाणीबरोबरच वाहनाचे नुकसान केल्याचा आरोपही करण्यात आला आहे.
घटनेनंतर जखमींनी पोलिसांकडे धाव घेतली. याप्रकरणी संबंधित व्यक्तींविरुद्ध फिर्याद दाखल करण्यात आली असून पोलिसांनी गुन्हा नोंदविला आहे. गुन्ह्याचा वर्दी अहवाल न्यायालयात पाठविण्याची कार्यवाही सुरू करण्यात आली आहे.
या प्रकरणाचा पुढील तपास पोलीस हेड कॉन्स्टेबल कोकरे यांच्याकडे सोपविण्यात आला आहे. घटनेमागील नेमका वाद कशामुळे झाला, हल्ल्यात वापरण्यात आलेली हत्यारे कोणती होती, वाहनाचे किती नुकसान झाले आणि या प्रकरणात आणखी कोणाचा सहभाग आहे का, याचा तपास पोलीस करत आहेत.
दरम्यान, पोलिस तपास पूर्ण झाल्यानंतरच या घटनेतील आरोपांची अधिकृत सत्यता आणि संबंधितांची भूमिका स्पष्ट होणार आहे. नागरिकांनी कोणत्याही वादाचे रूपांतर हाणामारीत न करता कायदेशीर मार्गाचा अवलंब करावा, असे आवाहन करण्यात येत आहे.
About the Author
