पंढरपूर / प्रवीण शिवपुजे : आषाढी वारीच्या पार्श्वभूमीवर लाखो वारकऱ्यांच्या आरोग्याची काळजी घेत पंढरपूर शहरात अन्न व औषध प्रशासन विभागाने मोठी आणि व्यापक कारवाई सुरू केली आहे. विभागाचे आयुक्त तुकाराम मुंढे यांच्या मार्गदर्शनाखाली विशेष तपासणी मोहीम राबविण्यात येत असून शहरातील विविध खाद्यपदार्थ विक्रेते, हॉटेल्स, मिठाई दुकाने, किराणा व्यापारी तसेच इतर अन्न व्यवसाय करणाऱ्या आस्थापनांची कसून तपासणी करण्यात येत आहे. या धडक मोहिमेमुळे अन्नपदार्थांमधील भेसळ रोखण्यास मोठी मदत होणार असल्याचा विश्वास प्रशासनाने व्यक्त केला आहे.
आषाढी वारीसाठी राज्यासह देशभरातून लाखो वारकरी पंढरपुरात दाखल होत असतात. या काळात अन्नपदार्थांची मोठ्या प्रमाणावर विक्री होत असल्याने काही ठिकाणी निकृष्ट दर्जाचे किंवा भेसळयुक्त पदार्थ विक्रीस येण्याची शक्यता नाकारता येत नाही. याच पार्श्वभूमीवर अन्न व औषध प्रशासनाने वारीपूर्वीच व्यापक तपासणी मोहीम हाती घेतली असून अन्न सुरक्षा आणि गुणवत्ता याबाबत कोणतीही तडजोड केली जाणार नसल्याचा स्पष्ट संदेश दिला आहे.
या विशेष मोहिमेअंतर्गत अन्न व औषध प्रशासनाच्या अधिकाऱ्यांनी पंढरपूर शहरातील एकूण ६८ आस्थापनांची तपासणी केली. तपासणीदरम्यान विविध प्रकारच्या खाद्यपदार्थांचे १०५ नमुने अधिकृतरीत्या ताब्यात घेऊन प्रयोगशाळेत विश्लेषणासाठी पाठविण्यात आले आहेत. या नमुन्यांमध्ये मिठाई, दुग्धजन्य पदार्थ, खाद्यतेल, मसाले, पेये, फराळाचे पदार्थ तसेच इतर खाद्यपदार्थांचा समावेश असल्याची माहिती प्रशासनाने दिली.
प्रयोगशाळेतील अहवाल प्राप्त झाल्यानंतर संबंधित नमुने निकृष्ट किंवा भेसळयुक्त आढळल्यास संबंधित आस्थापनांवर अन्न सुरक्षा व मानके कायद्यानुसार कठोर कारवाई करण्यात येणार आहे. दोषी आढळणाऱ्या व्यापाऱ्यांविरोधात दंडात्मक तसेच कायदेशीर कारवाई करण्यात येईल, असा इशाराही विभागाने दिला आहे.
वारी काळात वारकऱ्यांना सुरक्षित, स्वच्छ आणि दर्जेदार अन्न उपलब्ध व्हावे, हा या विशेष मोहिमेचा मुख्य उद्देश असल्याचे अधिकाऱ्यांनी सांगितले. यासाठी अन्न व औषध प्रशासनाचे अधिकारी आणि कर्मचारी २४ तास सज्ज असून शहरातील विविध भागांमध्ये सातत्याने तपासण्या सुरू आहेत. संशयास्पद अन्नपदार्थ, अस्वच्छता किंवा भेसळीची माहिती मिळाल्यास तत्काळ संबंधित ठिकाणी जाऊन तपासणी केली जात असल्याचेही प्रशासनाने स्पष्ट केले.
याशिवाय व्यापाऱ्यांना अन्न सुरक्षा नियमांचे पालन करण्याच्या सूचना देण्यात आल्या असून स्वच्छता, अन्नपदार्थांची योग्य साठवणूक, कालबाह्य वस्तूंची विक्री टाळणे आणि ग्राहकांना दर्जेदार अन्न उपलब्ध करून देण्याबाबत मार्गदर्शन करण्यात येत आहे. नियमांचे उल्लंघन करणाऱ्या कोणत्याही आस्थापनाला कोणतीही सवलत दिली जाणार नसल्याचे प्रशासनाने स्पष्ट केले आहे.
दरवर्षीप्रमाणे यंदाही आषाढी वारीसाठी लाखो भाविक पंढरपुरात येत असल्याने आरोग्याच्या दृष्टीने विशेष दक्षता घेणे आवश्यक आहे. अन्न व औषध प्रशासनाच्या या धडक कारवाईमुळे भेसळयुक्त अन्नपदार्थांवर प्रभावी नियंत्रण येण्यास मदत होणार असून वारकऱ्यांना सुरक्षित आणि गुणवत्तापूर्ण अन्न मिळण्याचा मार्ग अधिक सुकर होणार आहे.
अन्न व औषध प्रशासनाने नागरिक आणि वारकऱ्यांनाही आवाहन केले आहे की, संशयास्पद किंवा निकृष्ट दर्जाचे अन्नपदार्थ आढळल्यास तात्काळ प्रशासनाला माहिती द्यावी. वारकऱ्यांच्या आरोग्याशी कोणतीही तडजोड न करता संपूर्ण वारी काळात तपासणी मोहीम अधिक तीव्र करण्यात येणार असल्याचे विभागाने सांगितले.
About the Author
