सांगोला : सांगोला तालुक्यातील हंगिरगे येथे बहिणीस विनाकारण त्रास देण्याचा जाब विचारल्याच्या कारणावरून एका दलित कुटुंबावर जमावाने घरासमोर येऊन हल्ला केल्याची गंभीर घटना उघडकीस आली आहे. प्लास्टिकच्या पाईपांनी मारहाण, शिवीगाळ, दमदाटी आणि जीवे मारण्याची धमकी दिल्याप्रकरणी सांगोला पोलिस ठाण्यात १० जणांविरोधात अनुसूचित जाती-जमाती अत्याचार प्रतिबंधक कायद्यांतर्गत (अॅट्रॉसिटी) गुन्हा दाखल करण्यात आला आहे. या घटनेमुळे हंगिरगे परिसरात खळबळ उडाली असून गावात तणावाचे वातावरण निर्माण झाले आहे.
मिळालेल्या माहितीनुसार, सांगोला तालुक्यातील हंगिरगे येथील मागासवर्गीय समाजातील दाजी सायाप्पा लांडगे (वय ७२) यांच्या नातीला शाळेत ये-जा करताना गावातील उमेश प्रकाश टोकले हा युवक वारंवार विनाकारण त्रास देत होता. याबाबत अनेक दिवसांपासून कुटुंबीयांमध्ये नाराजी होती. अखेर मुलीचा भाऊ रोहन याने उमेश टोकले यास “माझ्या बहिणीला विनाकारण त्रास का देतो?” असा जाब विचारला.
यावेळी आरोपी उमेश टोकले याने संताप व्यक्त करत “तु मला विचारणारा कोण? तुला बघून घेतो,” अशी धमकी दिली आणि तेथून निघून गेला. मात्र, हा वाद तिथेच थांबला नाही. रात्रीच्या सुमारास या घटनेने गंभीर वळण घेतल्याचे फिर्यादीत नमूद करण्यात आले आहे.
फिर्यादीनुसार, रात्री सुमारे आठ वाजण्याच्या सुमारास उमेश प्रकाश टोकले, अरुण दगडू टोकले, सोमा अशोक गुजले, महादेव माणिक चैवरे, बाबू गुंडोपंत टोकले, प्रविण मनोज गुजले, गणेश आण्णा गुजले, विजय हरी टोकले, नितीन खंडू गुजले आणि संतोष विलास गुजले हे सर्वजण एकत्रितपणे लांडगे कुटुंबाच्या घरासमोर आले. “रोहन कुठे आहे? त्याला आता बघतोच, जिवंत ठेवत नाही,” अशा शब्दांत त्यांनी जोरदार आरडाओरडा करत शिवीगाळ व दमदाटी सुरू केल्याचा आरोप करण्यात आला आहे.
यावेळी काही आरोपींच्या हातात प्लास्टिकचे पाईप होते. उमेश टोकले, विजय हरी टोकले, प्रविण मनोज गुजले आणि अजय हरी टोकले यांच्या हातातील पाईपांनी त्यांनी दाजी लांडगे, त्यांची पत्नी जयश्री लांडगे आणि नातू रोहन यांना मारहाण केल्याचे तक्रारीत म्हटले आहे. अचानक झालेल्या या हल्ल्यामुळे कुटुंबीय घाबरून गेले. स्वतःचा बचाव करण्यासाठी त्यांनी आरडाओरडा सुरू केला.
गावात आरडाओरडा झाल्यानंतर काही नागरिक घटनास्थळी जमा होण्यास सुरुवात झाल्याचे समजताच आरोपींनी तेथून पळ काढला. मात्र, जाताना “पुन्हा आमच्या नादाला लागलात तर जिवंत ठेवणार नाही,” अशी धमकी दिल्याचेही फिर्यादीत नमूद करण्यात आले आहे. या प्रकारामुळे कुटुंबीयांमध्ये भीतीचे वातावरण पसरले असून त्यांनी पोलिस संरक्षणाची मागणी केल्याची चर्चा आहे.
दरम्यान, या मारहाणीच्या गोंधळात दाजी लांडगे यांच्या पत्नी जयश्री यांच्या गळ्यातील मंगळसूत्र हरविल्याची बाबही समोर आली आहे. मारहाणीत ते कुठेतरी पडून गहाळ झाल्याचे फिर्यादीत नमूद करण्यात आले असून याबाबतही तपास सुरू करण्यात आला आहे.
या घटनेनंतर पीडित कुटुंबीयांनी सांगोला पोलिस ठाण्यात धाव घेत तक्रार दाखल केली. पोलिसांनी प्राथमिक चौकशी करून आरोपींविरोधात भारतीय न्याय संहिता (BNS) 2023 अंतर्गत विविध कलमांनुसार गुन्हा दाखल केला आहे. त्यामध्ये मारहाण, धमकी, बेकायदेशीर जमाव जमविणे, शिवीगाळ व शांतता भंग करण्यासंदर्भातील कलमांचा समावेश आहे.
तसेच, पीडित कुटुंब अनुसूचित जाती प्रवर्गातील असल्याने अनुसूचित जाती व अनुसूचित जमाती (अत्याचार प्रतिबंधक) अधिनियम १९८९ अंतर्गत कलम 3(1)(r), 3(1)(s) आणि 3(2)(va) नुसारही गुन्हा दाखल करण्यात आला आहे. या कायद्याअंतर्गत जातीय द्वेषातून अपमान, धमकी किंवा अत्याचार केल्यास कठोर कारवाईची तरतूद आहे.
या प्रकरणी पोलिसांनी आरोपींची नावे निष्पन्न केली असून पुढील तपास सुरू आहे. संबंधित आरोपींना अटक करण्याच्या हालचाली सुरू असल्याची माहिती पोलिस सूत्रांकडून मिळत आहे. तसेच, घटनेतील सर्व बाजू तपासून कायदेशीर कारवाई केली जाईल, असे पोलिसांकडून सांगण्यात आले.
हंगिरगे येथील या घटनेमुळे परिसरात चर्चेला उधाण आले असून, महिलांना छेडछाड व त्रास देण्याच्या घटनांकडे गांभीर्याने पाहण्याची गरज पुन्हा एकदा अधोरेखित झाली आहे. किरकोळ वादातून सुरू झालेला हा प्रकार थेट मारहाण आणि अॅट्रॉसिटीच्या गुन्ह्यापर्यंत पोहोचल्याने नागरिकांमध्येही चिंता व्यक्त होत आहे. गावातील सामाजिक सलोखा टिकवण्यासाठी प्रशासनाने तत्काळ लक्ष घालण्याची मागणी स्थानिकांकडून केली जात आहे.
About the Author
