जगभरात मायक्रोसॉफ्टमध्ये ६,००० कर्मचारी कपात; कर्मचाऱ्याने सांगितला हृदयद्रावक अनुभव!
Layoff : मायक्रोसॉफ्टने(Microsoft Employee) नुकतीच मोठ्या प्रमाणात कर्मचाऱ्यांची कपात करण्याची घोषणा केली आहे. कंपनीच्या जागतिक स्तरावरील कर्मचाऱ्यांपैकी सुमारे ३ टक्के, म्हणजेच सुमारे ६,००० कर्मचाऱ्यांवर याचा परिणाम होणार आहे. ही कपात अनेक विभाग, भूमिका आणि देशांमध्ये करण्यात आली आहे. अमेरिकेतील वॉशिंग्टन या कंपनीच्या मूळ राज्यात सुमारे २,००० नोकऱ्या गेल्याची माहिती राज्य सरकारच्या कामगार विभागाने दिली आहे.
कंपनीने (Microsoft) सांगितले की, व्यवस्थापन प्रक्रिया सुलभ करणे, अधिकाऱ्यांची संख्या कमी करणे आणि कृत्रिम बुद्धिमत्तेचा (Artificial Intelligence – AI) अधिकाधिक वापर करणे या उद्देशाने ही पाऊले उचलण्यात आली आहेत. मायक्रोसॉफ्टच्या प्रवक्त्याने सांगितले, “गतिमान बाजारपेठेत कंपनीला यशस्वीरित्या पुढे नेण्यासाठी आवश्यक असलेले संघटनात्मक बदल आम्ही करत आहोत.”
कर्मचाऱ्याने सांगितला हृदयद्रावक अनुभव
या टाळेबंदीत अनेक कर्मचाऱ्यांनी आपल्या भावना व्यक्त केल्या आहेत. मायक्रोसॉफ्टमध्ये सात वर्षांहून अधिक काळ काम केलेल्या एका महिला कर्मचाऱ्याने सोशल मीडिया प्लॅटफॉर्मवर आपला अनुभव सांगितला. एका उच्च अधिकाऱ्याकडून अचानक आलेल्या कॅलेंडर इनव्हाइटद्वारे तिला कामावरून काढण्यात आले, असे तिने नमूद केले.
उत्तम आर्थिक निकालांनंतरही नोकरकपात
विशेष म्हणजे, मायक्रोसॉफ्टने (Microsoft) जानेवारी ते मार्च या तिमाहीसाठी चांगले आर्थिक फायदे जाहीर केल्यानंतर काही आठवड्यांतच ही घोषणा केली आहे. कंपनीच्या क्लाउड कॉम्प्युटिंग आणि एआय विभागात मोठी वाढ झाली आहे. आता ५० वा वर्धापनदिन साजरा करत असलेली ही कंपनी, २०२२ मध्ये चॅटजीपीटीच्या पदार्पणानंतर आपल्या उत्पादनांमध्ये एआयचा समावेश करण्यात आघाडीवर आहे. असे असूनही, कंपनीने खर्च कमी करण्याच्या उद्देशाने हा कठोर निर्णय घेतला आहे.
