सांगोला : सांगोला तालुक्यातील लग्नसोहळ्यात जेवण वाढताना झालेल्या वादातून दोन गटांमध्ये तुंबळ हाणामारी झाली. या घटनेत तिघेजण गंभीर जखमी झाले असून भांडण सोडवण्यासाठी आलेल्यांनाही मारहाण करण्यात आली.
ही घटना जवळा येथील अहिल्या चौकात घडली. पोलिसांनी दिलेल्या माहितीनुसार, फिर्यादी व त्याचा भाऊ लग्न समारंभासाठी दुचाकीवरून जात असताना, काही व्यक्तींनी त्यांना अडवून “लग्नात शिवीगाळ का केली?” असा सवाल करत मारहाण केली. लाथाबुक्क्यांसह चाकू, काठी, लोखंडी रॉडने हल्ला करण्यात आला.
जखमींवर सांगोला येथील खासगी रुग्णालयात उपचार सुरू आहेत. या प्रकरणी सांगोला पोलिस ठाण्यात परस्परविरोधी फिर्यादी दाखल झाल्या असून गुन्हा नोंदवण्यात आला आहे. या प्रकरणाचा पुढील तपास पोलीस करत आहेत.
