मंगळवेढा/प्रतिनिधी: मोहोळ तालुक्यातील जामगाव येथे एका घरजावई तरुणाने सासुरवाडीतच आत्महत्या केल्याची खळबळजनक घटना समोर आली आहे. पत्नीच्या अनैतिक संबंधामुळे निर्माण झालेल्या भांडणांतून सतत होणाऱ्या छळास कंटाळून त्याने टोकाचा निर्णय घेतला. या प्रकरणी पत्नी, सासू, पत्नीचा प्रियकर व त्याच्या वडिलांविरोधात आत्महत्येस प्रवृत्त केल्याचा गुन्हा दाखल करण्यात आला आहे.
मृत तरुणाचे वय ३४, रा. खुपसंगी, ता. मंगळवेढा असे आहे. या प्रकरणी त्याचे भाऊ यांनी कामती पोलीस ठाण्यात फिर्याद दिली आहे.
फिर्यादीनुसार, हा तरुण पत्नीच्या आग्रहावरून सासुरवाडीत राहू लागले होते. त्यांनी आपल्या मूळ गावातील मालमत्ता विकून त्याचे पैसे सासुरवाडीत असलेल्या शेतीच्या विकासासाठी गुंतवले होते. काही काळ सर्व काही सुरळीत असतानाच, पत्नीचे तिच्याच नात्यातील एका तरुणासोबत अनैतिक संबंध असल्याचे समोर आले. त्यामुळे कुटुंबात तणाव निर्माण झाला.
या तणावातून अनेकवेळा वाद, भांडण होत राहिले. विशेष म्हणजे, पत्नीच्या प्रियकराचे वडीलही त्याच शेतजमिनीत शेती करू लागले होते. यामुळे तरुणाला मानसिक त्रास सहन करावा लागला. त्यांनी यापूर्वी दोन वेळा स्थानिक पोलिसांकडे तक्रारही केली होती, मात्र कोणतीही ठोस कारवाई झाली नव्हती. शेवटी, पत्नी, सासू, प्रियकर आणि प्रियकराचे वडील यांनी केलेल्या मानसिक छळामुळे तरुणाने आत्महत्या केली. आरोप फिर्यादीत करण्यात आले आहेत. पोलिसांनी चौघांविरोधात आत्महत्येस प्रवृत्त करण्याचा गुन्हा दाखल केला असून पुढील तपास सुरू आहे.
