ऑनलाइन डेस्क : धावपळीच्या जीवनशैलीतून थोडा विरंगुळा हवा असेल, तर साहसी पर्यटन हा उत्तम पर्याय आहे. भारतात अशी अनेक ठिकाणं आहेत जिथे तुम्ही बंजी जंपिंगसारख्या थरारक ॲडव्हेंचरचा आनंद घेऊ शकता. सुट्ट्यांना खास बनवण्यासाठी सर्वोत्तम बंजी जंपिंग एकदा केले पाहिजे.
देशातील सर्वात उंच बंजी जंपिंग स्पॉट
ऋषिकेश हे आध्यात्मिकतेसोबत साहसासाठीही प्रसिद्ध ठिकाण आहे. येथे 83 मीटर उंचीवरून बंजी जंपिंग केलं जातं, जे भारतातलं सर्वात उंच बंजी स्पॉट मानलं जातं. शिवपुरी आणि मोहनचट्टी येथे तुम्ही हा थरार अनुभवू शकता. निसर्गरम्य वातावरण आणि सुरक्षित व्यवस्था यामुळे हा अनुभव अविस्मरणीय ठरतो.
मुंबई-पुण्याच्या जवळचं ॲडव्हेंचर ठिकाण
महाराष्ट्रातील लोणावळा हे फक्त डोंगरदऱ्यांमुळेच नाही, तर साहसी खेळांमुळेही प्रसिद्ध आहे. येथे तुम्ही 28 मीटर उंचीवरून बंजी जंपिंग करू शकता. विशेष म्हणजे, ही सुविधा पूर्णपणे सुरक्षित असून प्रशिक्षित कर्मचार्‍यांच्या मार्गदर्शनाखाली उपलब्ध आहे. मुंबई आणि पुण्याजवळचं हे उत्तम वीकेंड डेस्टिनेशन ठरू शकतं.
गोवा – बीचवर बंजी जंपिंगचा थरार
गोवा म्हटलं की समुद्रकिनारे आणि पार्टी हे नेहमी लक्षात येतं. पण आता गोव्यात अंजुना बीचवर 35 मीटर उंचीवरून बंजी जंपिंग देखील उपलब्ध आहे. ग्रॅव्हिटी झोन या ठिकाणी ही सुविधा असून, देशविदेशातील पर्यटक येथे थरार अनुभवण्यासाठी गर्दी करतात. बीचच्या पार्श्वभूमीवरचा हा अनुभव आणखीनच खास वाटतो.
जर तुम्हाला तुमच्या सुट्ट्यांमध्ये काहीतरी वेगळं आणि साहसी अनुभवायचं असेल, तर ही ठिकाणं तुमच्यासाठीच आहेत. बंजी जंपिंगसारखा अनुभव केवळ थरारदायक नसतो, तर आत्मविश्वास वाढवणारा आणि आयुष्यभर लक्षात राहणारा ठरतो!
तुमचं साहसी मन जागं ठेवा आणि भारतातील बेस्ट बंजी डेस्टिनेशनला भेट द्या!
About the Author
