मुंबई / प्रतिनिधी : राज्य शासनाने बुधवारी आठ आयएएस अधिकाऱ्यांच्या बदल्यांचे आदेश जारी केले आहेत. यामध्ये महत्त्वाच्या पदांवरील अधिकाऱ्यांच्या जबाबदाऱ्यांमध्ये फेरबदल करण्यात आले असून, अनेक जिल्ह्यांमध्ये प्रशासनिक पातळीवर नव्या नियुक्त्या करण्यात आल्या आहेत.
पुणे महापालिका आयुक्त डॉ. राजेंद्र भोसले यांची बदली करण्यात आली असून त्यांच्या जागी 2008 बॅचचे आयएएस अधिकारी नवल किशोर राम यांची नियुक्ती झाली आहे.
अमरावतीचे जिल्हाधिकारी सौरभ कटीयार यांची बदली मुंबई उपनगर जिल्ह्याचे जिल्हाधिकारी म्हणून करण्यात आली आहे.
चंद्रकांत डांगे यांची मंत्रालयातील मुख्य सचिवांच्या कार्यालयात सहसचिव पदावर बदली झाली आहे, तर शीतल तेली-उगले यांची नेमणूक क्रीडा आणि युवक सेवा विभागाच्या आयुक्त म्हणून करण्यात आली आहे.
धुळे जिल्हाधिकारी जे. एस. पापळकर यांची छत्रपती संभाजीनगरच्या विभागीय आयुक्तपदी बदली झाली असून, त्यांच्या जागी सिडकोच्या छत्रपती संभाजीनगर येथील मुख्य प्रशासकीय अधिकारी भाग्यश्री विसपुते यांची नियुक्ती धुळे जिल्हाधिकारी म्हणून झाली आहे.
अतिरिक्त जमाबंदी आयुक्त तथा भूमिअभिलेख विभाग, पुणे येथील अतिरिक्त संचालक आनंद भंडारी यांची अहिल्यानगर जिल्हा परिषदेच्या मुख्य कार्यकारी अधिकारी पदावर वर्णी लागली आहे.
तसेच, सध्या अहिल्यानगर जिल्हा परिषदेचे मुख्य कार्यकारी अधिकारी असलेले आशीष येरेकर यांची अमरावती जिल्हाधिकारी पदावर बदली करण्यात आली आहे.
