मुंबई / प्रतिनिधी: दहिसरमधील एका गगनचुंबी इमारतीत संध्याकाळी एक अत्यंत दुर्दैवी घटना घडली. मुलीचा आठव्या मजल्यावरून पडून मृत्यू झाला. ती सूर्यास्ताचे फोटो घेत असताना तिचा तोल जाऊन ही दुर्घटना घडली. मुलगी आई-वडिलांची एकुलती एक होती. तिच्या अचानक जाण्याने संपूर्ण परिसरात हळहळ व्यक्त केली जात आहे.
पोलिसांनी दिलेल्या माहितीनुसार, मुलगी नुकतीच दहावी उत्तीर्ण झाली होती. ती एका आंतरराष्ट्रीय शाळेत शिक्षण घेत होती. सायंकाळी ७ वाजण्याच्या सुमारास ती दहिसर पूर्वेतील मिस्टिका नगर येथील ‘परिचय’ इमारतीच्या आठव्या मजल्यावर सूर्यास्ताचे छायाचित्र घेण्यासाठी गेली होती. तेव्हा तिचा तोल गेला आणि ती खाली पडली. तातडीने जवळच्या रुग्णालयात नेण्यात आलं, पण डॉक्टरांनी तिला मृत घोषित केलं.
मुलीला छायाचित्रणाची आणि सोशल मीडियावर रील्स बनवण्याची आवड होती. तिच्या वडिलांनी छतावर फोटो घेण्याची परवानगी दिली होती. त्यावेळी तिचे वडील ग्राउंड फ्लोअरवरील बाकावर बसले होते. या घटनेने त्यांच्यासमोरच मुलीचा जीव गेला, हे दुःख शब्दांत मांडता येणार नाही.
पोलीस घटनास्थळी दाखल झाले असून, त्यांनी घटनेचा पंचनामा करून अपघाती मृत्यूची नोंद केली आहे. मुलगी त्या वेळी छतावर एकटीच होती. कुठलाही घातपात नसल्याचं तिच्या आई-वडिलांनी पोलिसांना सांगितलं आहे. छतावरील संरक्षक भिंत वर बसून फोटो घेत असताना तोल गेल्याने ही दुर्घटना घडल्याची माहिती त्यांनी दिली आहे.
ही घटना सोशल मीडियाच्या वाढत्या आकर्षणाबाबत अनेक प्रश्न उपस्थित करते. पालकांनी आणि तरुणांनी अशा प्रसंगी सुरक्षिततेची अधिक काळजी घेणं आवश्यक आहे.
मुलीचा अकस्मात निधनाने तिच्या कुटुंबावर दुःखाचा डोंगर कोसळला असून, परिसरात शोककळा पसरली आहे.
About the Author
