पंढरपूर/प्रतिनिधी: पंढरपूर-मंगळवेढा सीमावर्ती भागातील शेतकऱ्यांसाठी दिलासादायक बातमी! उन्हाळ्याच्या झळा वाढत असताना माण नदीवरील बंधारे उजनी कालव्याच्या पाण्यामुळे भरल्याने नदीकाठच्या पिकांना नवसंजीवनी मिळाली आहे. ऊस, फळबागा आणि चारा पिके जोमाने डोलू लागली असून, पाणीटंचाईचा प्रश्नही काही प्रमाणात सुटला आहे.
उजनी कालव्याचे पाणी माण नदीत सोडले
माण नदी, जी बहुतेक वेळा कोरडीच असते, त्यात महमदाबाद शेटफळ येथून उजनी कालव्याचे पाणी सोडण्यात आले. यामुळे तावशी-मारापूर, सिध्देवाडी, ओझेवाडी, सरकोली येथील बंधारे भरले गेले आहेत. परिणामी, ऐन उन्हाळ्यातही नदी प्रवाही झाली असून, आसपासची शेती आणि फळबागा फुलू लागल्या आहेत.
शेतकऱ्यांना जीवदान
या पाण्यामुळे उसासह द्राक्ष, डाळिंब, बोर अशा फळबागांना चालना मिळाली आहे. चारा पिकांचाही बहर सुरू असून, पशुखाद्याचा तुटवडा टळणार आहे.
शेतीबरोबरच नागरिकांच्या पिण्याच्या पाण्याचा तुटवडाही दूर झाला आहे. बंधाऱ्यांमध्ये पाणी साठल्यामुळे जूनपर्यंत पाणीपुरवठा सुरळीत राहण्याची अपेक्षा आहे.
सार्वजनिक प्रतिनिधींचा पुढाकार
बंधारे भरून घेण्यासाठी स्थानिक आमदार समाधान आवताडे आणि माजी आमदार प्रशांत परिचारक यांनी उजनी कालवा विभागाकडे पाठपुरावा केला होता. तसेच पुण्यातील सिंचन बैठकीतही यावर चर्चा झाली होती. या मागण्यांचा सकारात्मक परिणाम झाल्याने शेतकऱ्यांमध्ये समाधानाचे वातावरण आहे. पाण्याची ही तात्पुरती उपलब्धता उन्हाळ्यात मोठा दिलासा ठरत असली, तरी दीर्घकालीन उपाययोजना आवश्यक असल्याचे जाणकारांचे मत आहे. परंतु सध्या तरी माण नदीच्या पुनरुज्जीवनामुळे शेतकऱ्यांच्या आशा पुन्हा पल्लवित झाल्या आहेत.
