धक्कादायक! पुरुषांमध्ये नैराश्याचे प्रमाण महिलांपेक्षा दुप्पट; ‘या’ जिल्ह्यात सर्वाधिक नैराश्यग्रस्त

मुंबई :  राज्यातील पुरुषांमध्ये महिलांपेक्षा दुप्पटीने अधिक नैराश्य आहे, असा खुलासा हेल्पलाइनवरील कॉलच्या आकडेवारीवरून झाला आहे. आरोग्य विभागाच्या ‘टेलीमित्र’ हेल्पलाइनवर मानसिक आरोग्याशी संबंधित मदतीसाठी आलेल्या कॉलच्या अभ्यासातून ही माहिती समोर आली.

हेल्पलाइनवर आलेल्या एकूण कॉल्सपैकी 68 टक्के कॉल पुरुषांचे होते, तर महिलांकडून फक्त 31 टक्के कॉल्स आले. विशेष बाब म्हणजे, 18 ते 45 वयोगटातील नागरिकांकडून 71 टक्के कॉल्स आले. यामध्ये कामाच्या ठिकाणचा ताण, बिघडलेली नाती, नैराश्य, चिंता, एकटेपणा, व्यसनाधीनता, अतिविचार अशा समस्या प्रामुख्याने मांडण्यात आल्या

कशासाठी येतात हेल्पलाइन कॉल?

कामाचा ताण, बिघडलेली नाती, एकटेपणा, चिंता, नैराश्य, व्यसनाधीनता, झोपेच्या समस्या — यांसारख्या कारणांनी नागरिक हेल्पलाइनवर मदतीसाठी कॉल करत आहेत.

या सर्वात पुरुषांचा वाटा तब्बल 68 टक्के असून, महिलांकडून केवळ 31 टक्के कॉल्स आले. म्हणजेच, महिलांपेक्षा पुरुष मानसिक तणावात अधिक असण्याचे संकेत या आकडेवारीतून मिळतात.

कोणत्या वयोगटातील आहेत कॉलर्स?

कॉल करणाऱ्यांपैकी 71 टक्के नागरिक 18 ते 45 वयोगटातील आहेत.

या वयोगटातील तरुण व प्रौढ पुरुष मानसिक समस्यांनी अधिक त्रस्त असल्याचे स्पष्ट होते.

कोणते जिल्हे सर्वाधिक नैराश्यग्रस्त?

राज्यात कोल्हापूर जिल्ह्यातील पुरुष सर्वाधिक नैराश्यग्रस्त आहेत.

यापाठोपाठ पुणे दुसऱ्या आणि मुंबई तिसऱ्या क्रमांकावर आहेत.

एकूण राज्यभरातून 1,45,431 कॉल्स हेल्पलाइनवर आले आहेत.

मन:स्वास्थ्याची गरज आणि जागरूकता

ही आकडेवारी पुरुषांच्या मन:स्वास्थ्याकडे गांभीर्याने पाहण्याची गरज अधोरेखित करते. समाजात अजूनही मानसिक आरोग्यावर मोकळेपणाने बोलले जात नाही. पुरुषांनी आपली व्यथा व्यक्त करावी, यासाठी सुस्पष्ट आणि विश्वासार्ह हेल्पलाइन आणि सेवा उपलब्ध करणे काळाची गरज आहे.