हिंदुत्वाची ओळख, स्वराज्याचे नाव “छत्रपती शिवाजी महाराज”

सांगोला/ विशेष प्रतिनिधी : छत्रपती शिवाजी महाराज यांची जयंती म्हणजे केवळ एक उत्सव नाही, तर स्वराज्य, पराक्रम आणि हिंदुत्वाच्या गौरवशाली इतिहासाचा साक्षात्कार आहे. यंदाही सांगोल्यासह महाराष्ट्रभर मोठ्या उत्साहात आणि दणक्यात शिवजयंती साजरी होत आहे. संपूर्ण राज्यात विविध ठिकाणी मिरवणुका, व्याख्याने आणि सांस्कृतिक कार्यक्रमांचे आयोजन करण्यात आले आहेत.  

शिवनेरीवर शिवरायांचा जयघोष

शिवाजी महाराजांचा जन्मस्थान असलेल्या शिवनेरी गडावर पहाटेपासूनच हजारो शिवप्रेमींची गर्दी पाहायला मिळाली. पारंपरिक वेशभूषा, भगवे निशाण आणि ‘जय भवानी, जय शिवाजी’च्या घोषणांनी गडाचा कण न् कण भारावून गेला. शिवनेरीवर जयंतीनिमित्त विशेष महाआरती करण्यात आली.

राज्यात विविध ठिकाणी शिवजयंती सोहळ्यांचे आयोजन

राज्यात सांगोला, पुणे, कोल्हापूर, सातारा, नाशिक, औरंगाबाद, ठाणे, मुंबईसह विविध शहरांमध्ये भव्य मिरवणुका आणि शिवरायांच्या जीवनावर प्रकाश टाकणारे कार्यक्रम आयोजित करण्यात आले आहेत. प्रत्येक ठिकाणी शिवप्रेमी मोठ्या संख्येने सहभागी होत आहेत. 

पुण्यात लाल महाल येथे शिवरायांच्या बालपणाच्या आठवणींना उजाळा देण्यात आला. कोल्हापुरात छत्रपती शिवाजी महाराजांच्या पुतळ्यास पुष्पांजली वाहण्यात आली. मुंबईतील शिवाजी पार्क येथे शिवचरित्रावर आधारीत विशेष व्याख्यानाचे आयोजन करण्यात आले. 

शिवरायांचे हिंदुत्व आणि स्वराज्य विचारधारा

छत्रपती शिवाजी महाराज यांनी केवळ तलवारीच्या जोरावर नव्हे, शौर्य, धर्मनिष्ठा आणि सुशासनाच्या माध्यमातून हिंदवी स्वराज्य उभे केले. ‘शिवाजी ही हिंदुत्वाची ओळख आहे, शिवाजी हे स्वराज्याचे दुसरे नाव आहे,’ असे विधान केवळ शब्दांपुरते मर्यादित नाही, तर त्यांच्या कार्यातून सिद्ध झालेले सत्य आहे. 

शिवरायांचे प्रशासन, धर्म सहिष्णुता, महिलांसाठी संरक्षण, शेतकऱ्यांसाठी दिलेले धोरण, लष्करी कौशल्य आणि समुद्रसत्तेचा विस्तार ही आजही मार्गदर्शक तत्त्वे आहेत. त्यांच्या विचारांवर प्रेरित होऊन अनेक युवक शिवरायांचे विचार आचरणात आणण्याचा संकल्प करत आहेत. 

शिवरायांची प्रेरणा पुढच्या पिढीसाठी दीपस्तंभ

शिवरायांचा इतिहास हा केवळ मराठी माणसापुरता मर्यादित नाही, तर संपूर्ण देशासाठी प्रेरणादायी आहे. त्यांच्या जयंतीच्या निमित्ताने त्यांचे विचार आणि शिकवणुकींचा प्रसार करणे आवश्यक आहे. आजच्या पिढीने शिवरायांच्या ध्येयधोरणांचा अभ्यास करून त्यांचे अनुकरण करणे गरजेचे आहे. 

“जय भवानी, जय शिवाजी!”

शिवजयंती निमित्त महाराष्ट्रातील जनतेने शिवरायांच्या विचारांची कास धरावी, त्यांच्या कार्यातून शिकावे आणि हिंदवी स्वराज्याचा वसा पुढे न्यावा, असा संदेश आजच्या शिवजयंती उत्सवातून दिला जात आहे. “हर हर महादेव!” आणि “जय भवानी, जय शिवाजी!”च्या गजरात संपूर्ण महाराष्ट्र शिवमय झाला आहे.