नागपूर : हिवाळी अधिवेशनाच्या राज्य सरकारने सामाजिक सुरक्षेपासून वाहतूक, महिलासक्षमीकरण आणि गुन्हेगारी नियंत्रणापर्यंत अनेक निर्णायक पावले उचलली आहेत. नागपूर अधिवेशनात सादर झालेले चार महत्त्वाचे निर्णय राज्यभरात चर्चेचा विषय ठरत आहेत.
1) भीक मागण्यावर बंदीचा मार्ग मोकळा
राज्यातील वाढत्या भीक मागण्यांच्या प्रकारांवर नियंत्रण आणण्यासाठी सरकारने ‘भीकबंदी विधेयक’ मंजूर केले आहे. यानुसार सार्वजनिक ठिकाणी भीक मागणे बेकायदेशीर ठरणार असून, समाजहितासाठी पुनर्वसनाची स्वतंत्र तरतूद ठेवण्यात आली आहे. आता या विधेयकावर अंतिम निर्णय हिवाळी अधिवेशनातील शेवटच्या बैठकीत होणार आहे.
2) ‘लाडकी बहीण’ योजनेतील फसवणूक उघड : पुरुषांनाही लाभ?
महिला लाभार्थ्यांसाठी सुरू केलेल्या लाडकी बहीण योजनेत मोठा घोटाळा उघड झाला आहे. 2.69 कोटी अर्जांपैकी अनेक अर्ज पुरुषांच्या नावावर असल्याचे सरकारने स्पष्ट केले. चुकीने मिळालेले पैसे सरकार दोन महिन्यांत वसूल करत असून, पुढील काळात कठोर पडताळणी यंत्रणा लागू करण्याचे निर्देश देण्यात आले आहेत.
3) ई-वाहनांवरील टोल तातडीने थांबवा—८ दिवसांची डेडलाईन
राज्यात ई-वाहनांना टोलमुक्ती जाहीर असूनही प्रत्यक्षात टोल आकारणी सुरू असल्याने अधिवेशनात तीव्र नाराजी व्यक्त झाली. अध्यक्षांनी परिवहन विभागाला आठ दिवसांत ई-वाहनांचा टोल पूर्णपणे थांबवण्याचे आदेश दिले आहेत.
त्याचबरोबर ई-वाहनांची ओळख पटवण्यासाठी आवश्यक डेटा-इंटिग्रेशन प्रक्रिया गतीने पूर्ण करण्याचे निर्देश देण्यात आले. चार्जिंग स्टेशनच्या कमतरतेवरही तातडीने उपाययोजना करण्याची मागणी झाली.
4) गुटखा विक्रेत्यांवर मकोका—अवैध विक्रीला मोठा आळा
गुटखा उत्पादन आणि विक्रीमुळे वाढणाऱ्या गुन्हेगारी जाळ्यावर नियंत्रण मिळवण्यासाठी सरकारने कडक भूमिका घेतली आहे. यापुढे गुटखा आणि सुगंधी सुपारी विक्रेत्यांवर मकोका (MCOCA) लागू करण्यात येणार आहे.
शाळा-महाविद्यालय परिसरात गुटखाबंदीची कठोर अंमलबजावणी होणार असून, अवैध गुटखा विक्री करणाऱ्यांवर मोठ्या प्रमाणात कारवाई होणार आहे.
हिवाळी अधिवेशनात घेतलेले हे निर्णय राज्यातील सामाजिक धोरणे आणि कायदा-सुव्यवस्थेवर व्यापक परिणाम घडवतील, असे राजकीय निरीक्षकांचे मत आहे. सरकार आता या निर्णयांची अंमलबजावणी कशी करते, याकडे सर्वांचे लक्ष लागले आहे.नागपूर अधिवेशनात सरकारचे मोठे निर्णय: ‘लाडकी बहीण’ योजना फसवणूक, भीकबंदीपासून गुटखा मकोकापर्यंत पाहा मुद्दे!
About the Author
