डॉ. शिरीष वळसंगकर प्रकरण, म्युच्युअल फंडात गुंतवले तब्बल 160 कोटी; मृत्युपत्रानुसार कोणाला मिळणार कोट्यवधींची संपत्ती?

सोलापूर/प्रतिनिधी: सोलापूर शहरातील ख्यातनाम न्युरोफिजिशियन डॉ. शिरीष वळसंगकर (वय 69) यांनी 18 एप्रिल रोजी रात्री स्वतःवर गोळी झाडून आयुष्य संपवलं. या दुर्दैवी घटनेने वैद्यकीय क्षेत्रासह संपूर्ण महाराष्ट्रात हळहळ व्यक्त केली जात आहे. दरम्यान, त्यांच्या आर्थिक व्यवहारांबाबत धक्कादायक माहिती समोर आली आहे – गेल्या 15 वर्षांत त्यांनी म्युच्युअल फंडात तब्बल 160 कोटी रुपयांची गुंतवणूक केली होती.

या प्रकरणाचा तपास सुरू असतानाच, डॉ. वळसंगकरांच्या निकटवर्तीयांनी दिलेल्या माहितीनुसार, त्यांनी SIP (Systematic Investment Plan) च्या माध्यमातून ही गुंतवणूक केली होती. गुंतवणूक तज्ज्ञांच्या म्हणण्यानुसार, ही रक्कम वाढून 300 कोटी रुपयांहून अधिक झाली असण्याची शक्यता आहे, आणि मृत्युपत्रानुसार ही कोट्यवधींची संपत्ती त्यांच्या वारसांना हस्तांतरित होणार आहे.

कुणाला मिळणार कोट्यवधींची संपत्ती?
डॉ. वळसंगकर यांनी कोणाला नॉमिनी म्हणून नोंदवलं आहे, याबाबत अद्याप अधिकृत माहिती समोर आलेली नाही. मात्र मृत्युपत्र आणि इतर कागदपत्रांच्या आधारे पुढील काळात संपत्तीचे वाटप होईल. त्यामुळे, त्यांच्या वारसदारांमध्ये या मोठ्या संपत्तीबाबत कोणती घडामोड होते, याकडे सर्वांचे लक्ष लागले आहे.

डॉ. वळसंगकर यांचा थोडक्यात प्रवास:

• शिक्षण: दयानंद महाविद्यालय (सोलापूर), डॉ. व्ही.एम. मेडिकल कॉलेज (MBBS, MD), आणि लंडनमधून MRCP (UK).
• त्यांनी ‘S P Institute of Neurosciences’ नावाचे अत्याधुनिक हॉस्पिटल उभारले होते.
• भारतभर प्रवासासाठी स्वतःचे खाजगी विमान विकत घेणारे ते काही मोजक्या डॉक्टरांपैकी एक होते.
• न्यूरोलॉजीच्या क्षेत्रात संशोधन व अनेक आंतरराष्ट्रीय शोधनिबंध सादर केले होते.

घटनाक्रम:
रात्री 8 वाजता डॉ. वळसंगकर रुग्ण तपासून घरी परतले. काही वेळातच त्यांच्या घराच्या बाथरूममधून गोळीबाराचा आवाज आला. कुटुंबीयांनी धाव घेतली असता ते रक्ताच्या थारोळ्यात आढळले. तत्काळ त्यांच्या स्वतःच्या रुग्णालयात उपचारासाठी नेण्यात आले, मात्र उपचारादरम्यान त्यांचा मृत्यू झाला.

पोलिस तपास:
आत्महत्येचे नेमके कारण अद्याप स्पष्ट झालेले नाही. अटकेत असलेल्या मनीषा मुसळे मानेची चौकशी सुरू आहे, तसेच कुटुंबीयांचीही चौकशी करण्यात येत आहे.